ТОШКЕНТ, 12 сен — Sputnik. Самарқанд шаҳрида олтимиш ёшдан ошган яширин равишда диний таълим бериб келган аёллар суд ҳукми билан жаримага тортилди, деб хабар қилди "Зарафшон" нашри.
Шу тариқа Ҳалима опанинг хонадонига Самарқанд шаҳрининг турли маҳаллаларида истиқомат қилувчи Азиза, Махфуза, Нурхон, Алина, Умида сингари 25-30 ёшдаги аёллар келишган.
Отинойилардек виқор билан сўз бошлаган Ҳалима опа дастлаб Аллоҳнинг ягоналиги, Яратганни доимо ёдда тутмоқ учун диний билимлар зарурлигини уқтириб, маъракалар ўтказиб, хайр-эҳсон қилиш савоблигини таъкидлаган, деб ёзади нашр.
Давлат диний таълим муассасасида таҳсил олмаган, кишиларга диний таълимот беришга тегишли органнинг рухсатисиз "диний маросим" ўтказаётган бу аёл илгари ҳам огоҳлантирилган, аммо худбинлик, ўзбошимчалик билан кексалигини пеш қилиб, яна аёлларни йиғган.
Оқибатда "яхши ният"да бошлаган хуфёна иши бошига бало келтирди. Ҳ.Сайфиева ва унинг шериклари маъмурий ҳуқуқбузарлар сифатида ҳуқуқ-тартибот идоралари томонидан қайд этилди.
Маъмурий ҳуқуқбузарликка йўл қўйган етти нафар аёл ишини кўриб чиқиш жойи ва вақти ҳақида чақирув хати орқали хабар қилинган бўлса-да, улар суд мажлисига келмаган. Маъмурий жавобгарлик тўғрисидаги Кодекснинг 294-моддасига асосан маъмурий иш улар иштирокисиз кўриб чиқилган.
Ҳалима Сайфиева, Наталья Пак, Азиза Камолова, Махфуза Асророва, Нурхон Камалова, Алина Кенжаева ва Умида Отамуродовалар айбдор деб топилиб, суд қарори билан жаримага тортилган.
