ТОШКЕНТ, 27 июн — Sputnik. Ўзбек халқининг миллий ифтихори саналган, уч ярим минг йилдан зиёд тарихга эга кураш ҳозирги кунда халқаро майдонда фаол оммалашиб бормоқда. Шу йилнинг 5-19 июн кунлари Корея Республикасининг Инчон шаҳрида кураш бўйича турнир бўлиб ўтди, деб хабар қилди "Жаҳон" АА.
Хабарга кўра, мазкур турнирда Ўзбекистондан Осиё ва жаҳон чемпионлари бўлган 5 нафар курашчи иштирок этди. Мусобақа якунларига кўра, Суҳроб Худойбердиев, Шаҳрам Аҳадов ва Руслан Бўриевлар барча рақибларини мағлуб этиб, олтин медал соҳибига айландилар ҳамда ўз мураббийлари Элмурод Соатов билан бирга шоҳсупанинг юқори босқичига кўтарилдилар.
Таъкидлаш жоизки, мусобақа маҳаллий оммавий ахборот воситаларида кенг ёритилди. Хусусан, "Инчеонилбо" нашрида чоп этилган мақолада таэквондонинг ватани бўлган Жанубий Кореянинг халқи якка курашнинг бошқа турларига ҳам ҳамиша катта қизиқиш билан ёндошиб келгани, шу жумладан, ўзбек кураши ҳам мамлакатда кенг оммалашиб бораётгани ҳақида ёзади.
Инчон шаҳар кенгаши вакили Чой Жонг Гукнинг фикрига кўра, курашнинг Жанубий Кореяда янада шуҳрат қозонишининг энг мақбул йўли, бу мамлакатда ўзбекистонлик полвонлар иштирокидаги мусобақаларнинг кўпроқ ўтказилишидир.
"Кураш — олишувнинг энг жозибадор ва назокатли турларидан бири ҳисобланади. Унинг Жанубий Кореяда кенг ёйилиши эса икки мамлакатимизда Шарқ яккакурашининг бошқа турлари ривожига ҳам ўзининг ижобий таъсирини кўрсатади", — деб таъкидлаган Гук.
Бизнинг Telegramдаги ўзбекча каналимизга обуна бўлинг ва энг янги хабарларни биринчи бўлиб ўқинг.
