ТОШКЕНТ, 6 июн — Sputnik. "Толибон" ҳаракати жангарилари афғон-тожик чегараси яқинида фаол жанговар ҳаракатлар олиб бормоқда, деб хабар берди Sputnik Тожикистон. Хабарга кўра, уруш ҳаракатлари Тожикистоннинг Панж тумани яқинидаги Қундуз вилоятининг Имом Соҳиб туманида бўлиб ўтмоқда.
Толибларнинг ҳужуми 4-5 июнь кунлари бошланганлиги қайд этилган. Хориж ахборот агентликлари ушбу ҳолат ҳақида ҳозирча хабар тарқатмаган.
"Ўтган тунда тартиб посбонлари операция бошлашди. Лекин толиблар ҳужумга ўтишди ва туман марказига яқинлашиб келишмоқда", — деди туман ҳокими Имомуддин Қурайший.
Илгарироқ Тожикистон миллий хавфсизлик қўмитаси чегара қўшинлари қўмондони, генерал-лейтенант Ражабали Раҳмонали Афғонистон билан чегарадаги вазиятдан ташвишда эканлиги хабар қилинганди. Унинг сўзларига кўра, террорчилик ҳаракати ўчоқлари Афғонистоннинг жанубидан шимоли томон силжиб бормоқда.
Бизнинг Telegramдаги ўзбекча каналимизга обуна бўлинг ва энг янги хабарларни биринчи бўлиб ўқинг.
