ТОШКЕНТ, 28 апр — Sputnik. Душанбеда давлат молиявий назорат ва коррупцияга қарши кураш агентлигининг 17 нафар ходими ҳибсга олинди.
"Тожикистоннинг янги тарихида ҳали бунақаси бўлмаган. Бу жуда сезиларли қадам. Гап илгари қилмишларига кўз юмиб келинган мартабали амалдорларнинг қўлга олиниши ҳақида борар экан бу жуда салмоқли иш", — деди Sputnik Тожикистонга интервьюсида мустақил эксперт Али Ализод.
Яқинда 18 йилга озодликдан маҳрум қилинган Душанбе капитал қурилиш бошқармаси собиқ раҳбари Саидшариф Анваров билан боғлиқ жиноят иши ҳибсга олинишларнинг асосий сабабларидан бири сифатида айтилмоқда. Анваров пора олиш ҳамда "Истиқлол" тиббий маркази қурилиши вақтида бюджет пулларини ўзлаштиришда айбланган.
"Ҳозирча булар миш-миш, тасдиқланган маълумот жуда кам. Лекин қиймати 60-70 миллион доллар деб баҳоланган яқинда очилган тиббиёт марказининг бу ишга боғлиқлиги бор. Ҳозирча катта тозалов кетяпти ва эҳтимол бу ҳали ҳаммаси эмас", — деб ҳисоблайди сиёсатшунос.
Ҳибсга олинганлар орасида тергов бошқармаси бошлиғи Фируз Холмуродов ва идора бошлиғининг собиқ ўринбосари Давлатбек Хайрзода ҳам бор.
Бизнинг Telegramдаги ўзбекча каналимизга обуна бўлинг ва энг янги хабарларни биринчи бўлиб ўқинг.
