ТОШКЕНТ, 10 апр — Sputnik. Тошкентдаги киночилар уйида Хитой Халқ Республикаси кинематографлари билан ижодий учрашув бўлиб ўтди, деб хабар қилди "Жаҳон" АА.
Хабарга кўра, учрашувда кинематография соҳасида ўзаро тажриба алмашиш, истиқболли лойиҳалар устида ишлаш, ҳамкорликда қисқа метражли, аниматсион, ҳужжатли ва бадиий филмлар суратга олиш, турли фестивал ва маданий тадбирлар ўтказиш бўйича режалар белгилаб олинган.
"China Film Promotion International" компанияси бош директори Гу Гуотсин Ўзбекистонлик ҳамкасблар билан ҳамкорликда профессионал кадрлар тайёрлаш ва уларнинг малакасини ошириш, соҳага замонавий техника ва технологияларни кенг жорий қилишга келишиб олганлиги ҳақида таъкидлаган. "Келгусида Ўзбекистон билан ҳамкорликда дурдона киноасарлар яратиш ниятидамиз", — деган у.
Учрашувда кино соҳасида ўзаро манфаатли ҳамкорликни янада ривожлантириш, мутахассислар алмашинувини йўлга қўйиш каби масалалар муҳокама қилинган.
