ТОШКЕНТ, 3 апр — Sputnik. Ўзбекистон Республикаси президенти Шавкат Мирзиёев 4 аперл тонгида Россияга йўл олади. Ушбу муносабат билан Ўзбекистон Бош вазирининг биринчи ўринбосари, "Ўзбекистон темир йўллари" АЖ раиси Ачилбай Раматов бошчилигидаги делегация Москва шаҳрига ташриф буюрди, деб хабар қилди Россиядаги Ўзбекистон элчихонаси матбуот-хизмати.
Ҳужжатларнинг асосий қисми Мирзиёевнинг Россияга уюштирадиган расмий сафари вақтида имзоланиши маълум қилинган.
Элчихона матбуот хизматига кўра, Тошкент ва Москва ўртасида Россиянинг УГМК-Холдинг компанияси билан Ўзбекистонда Тебинбулоқ темир конида ванадий-титан магнетит руда ишлаб чиқиш ҳамда пўлат ишлаб-чиқариш саноатини ривожлантириш бўйича меморандум (қиймати 1,5 миллиард доллар), Тошкент шаҳридаги металлургия заводи қурилишини молиялаштириш лойиҳаси доирасида Асака банк ва "Газпромбанк" АЖ ўртасида ҳамкорлик битими (88 миллион доллар), "Қишлоқ хўжалик техникаси Чирчиқ заводи" ОАЖ ишлаб чиқариш майдонларида ҳамкорликда қишлоқ хўжалик техникасини ишлаб-чиқаришни йўлга қўйиш ва бошқа қатор муҳим битимлар имзоланиши кутилмоқда.
Тадбир иштирокчилари шунингдек, савдо-иқтисодий ва инвестиция соҳасида ўзаро манфаатли иккиёқлама ҳамкорликни янада ривожлантириш масалаларини муҳокама қиладилар. Шунингдек, икки мамлакат тадбиркорлари ўртасида ҳамкорликни мустаҳкамлаш, ўзаро манфаатли лойиҳаларни ҳамкорликда ишлаб чиқиш ва ҳаётга татбиқ этиш масалалари ҳам кўриб чиқилади.
