ТОШКЕНТ, 30 мар — Sputnik. Мана бир неча кундирки ўзбекистонликлар Ўзбекистон Республикаси Меҳнат вазирлиги ташқи меҳнат миграцияси масалалари агентлиги сайти ишламаётгани ҳақида бонг уришаётган эди.
Бу ҳақда ҳатто бир нечта маҳаллий интернет нашрларда ҳам ёзилди.
Ушбу масалага ойдинлик киритиш мақсадида Спутник Ўзбекистон мухбири Меҳнат вазирлиги матбуот-хизмати билан боғланди.
"Сайтимиз ишлаяпти. Кеча анкета тўлдирганлар бугун ҳам тўлдиришга уринишса, уларнинг уринишлари беҳуда кетиши мумкин. Сабаби, мурожаат қилувчи ҳақидаги маълумотлар бизнинг базамизга киритилган бўлади. Мурожаат қилувчиларга логин ва парол берилган бўлса, демакки улар сайтимиздан рўйхатдан ўтган ҳисобланади", — деб маълумот берди матбуот-хизмати ходими.
Айни вақтда Меҳнат вазирлиги ташқи меҳнат миграцияси масалалари агентлигида Жанубий Кореяга кетиш учун онлайн анкетани тўлдириш 30 март соат 17.00га қадар узайтирилгани ҳақида хабар берилган.
