ТОШКЕНТ, 17 мар — Sputnik. Самарқанд вилояти прокуратурасига янги раҳбар тайинланди, деб хабар қилди Ўзбекистон Республикаси Бош прокуратураси матбуот хизмати.
"Ўзбекистон Республикаси Бош прокурорининг 2017 йил 15 мартдаги буйруғига мувофиқ адлия катта маслаҳатчиси Зуфаров Фарҳод Маҳамаджанович Ўзбекистон Республикаси Конституцияси ва "Прокуратура тўғрисида"ги Қонунига асосан Самарқанд вилояти прокурори этиб 5 йил муддатга тайинланди ва мазкур прокуратура ҳайъати раиси этиб тасдиқланди", — дейилади Бош прокуратура хабарида.
Шунингдек, Бухоро вилояти прокуратурасига ҳам янги раҳбар тайинлангани айтиб ўтилган.
Ўзбекистон Республикаси Бош прокурорининг 2017 йил 15 мартдаги буйруғига мувофиқ 3-даражали Давлат адлия маслаҳатчиси Валиев Баҳриддин Баҳодирович Бухоро вилояти прокурори этиб 5 йил муддатга тайинлангани ва мазкур прокуратура ҳайъати раиси этиб тасдиқлангани таъкидланган.
