Самарқанд вилоят бош имом хатиби ўринбосари газ, свет, сув пулини вақтида тўлашга чақирди

ТОШКЕНТ, 11 мар — Sputnik. Самарқанд вилоят бош имом хатиби ўринбосари, Имом Бухорий жоме масжиди имом хатиби Зайниддин Эшонқулов "Зарафшон" нашри орқали аҳолини сув, свет ва газ ҳақини вақтида тўлашга чақирди.

"Бугун ҳаётимизни сув, электр энергияси, табиий газсиз тасаввур қила олмаймиз. Бу неъматлар учун ҳар куни шукрона айтамиз. Аммо кейинги пайтда кўча-кўйда, давраларда ана шу неъматлардан исрофгарчилик билан ёки ноқонуний фойдаланиш, уларнинг ҳақини тўламаслик ҳолатлари ҳақида кўп эшитяпмиз. Бу ишларнинг ортида эса алдов, ўзганинг ҳақига хиёнат, бошқанинг мулкини ҳақ-ҳуқуқсиз ўзлаштириш каби динимиз томонидан буткул қораланган иллатлар ётади.

Газ ва электр энергияси давлатнинг мулки. Давлатнинг асосини эса халқ ташкил этишини инобатга оладиган бўлсак, ушбу неъматларнинг ҳақини тўламасдан фойдаланиш халқ мулкига хиёнат ҳисобланади. Қолаверса, давлат бюджетига тушадиган бу маблағларда пенсионерларнинг, кам таъминланганлар, ногиронлар, етим-есирларнинг ҳақи бор. Коммунал тўловларни амалга оширмаётганлар зикр этилган қатламлар ҳақини ўзлаштириб юбораётганлари, бу ишлари билан ўзганинг ҳақини еяётганларини билишлари лозим. Ваҳоланки, Қуръони каримда "Бир-бирларингизнинг молларингизни ботил йўл билан еманг", дея кишиларни бошқанинг мулкига кўз олайтиришдан қайтарилган.

Юқорида келтириб ўтилган ва улардан бошқа неъматлар инсонларга турли турмуш қийинчиликларини енгиллатиш, яшаш учун қулай шарт-шароитларни ҳозирлаш учун берилган. Шунинг билан бир қаторда Қуръони каримда "(Ер) юзидаги барча нарсалар фонийдир", демоқлик билан неъматлар абадий эмаслиги, маълум миқдор ва ўлчов билан чегаралаб қўйилгани маълум қилинган.

Бу табиий неъматлардан талаб этилган кўринишда фойдаланиш, уларда ҳамманинг ҳам бирдек ҳақи борлигини унутмаслик лозим.
Шундай бўлгач, ҳар бир фуқаро ўзига юклатилган вазифаларни астойдил бажариши, зиммасидаги мажбуриятларга виждонан ёндашмоғи ва ўзгаларнинг ҳақ-ҳуқуқларини поймол қилмаслиги, молига хиёнат этмаслиги зарур. Бунинг натижаси эса шу фуқаронинг ўзига, жамиятга, давлатга фақат манфаат келтириши шубҳасиз", — дейилади мақолада.