ТОШКЕНТ, 28 фев — Sputnik. Ўзбекистонда аҳолига табиий газ етказиб беришни барқарорлаштириш бўйича кенг миқёсли чоралар кўрилмоқда, деб хабар қилди "Ўзтрансгаз" компанияси вакиллари 27 феврал куни ўтказилган матбуот-анжумани доирасида.
"Газ тармоқларига уланмаган аҳоли пунктларига суюлтирилган газни етказиб бериш бўйича алоҳида ишлар бажарилмоқда. Бу борада 2,5 млн хонадонга табиий газ шу тарзда етказиб берилади. Бунда 60дан ортиқ газ тўлдирувчи станциялар ва пунктлар аҳолига хизмат кўрсатади. 200дан ортиқ сервис хизматлари газ баллонларини тарқатиш билан шуғулланади. Шунингдек, суюлтирилган газни манзилга етказишда 237та цистерна-вагонлар ва 90га яқин автоцистерналардан фойдаланилади", — деди "Ўзтрансгаз" вакили.
Соҳа ишчиларининг айтишича, ўтган йили республика бўйлаб қўшимча равишда 20та газ тўлдирувчи пункт фойдаланишга топширилган. Аҳолига 528 мингга яқин газ баллонлари етказиб берилган. Шу билан бирга, MAN маркали иккита пропан ташувчи ва 32 дона махсус Isuzu автомашиналари харид қилинган.
Қайд этиш жоизки, ҳозирда Ўзбекистонда аҳолининг табиий газдан фойдаланганлик учун қарзи жуда катта. Газ етказиб берувчилар қарзларни ундириш учун истеъмолчиларнинг уйларига бориб маблағ йиғиш амалиётини йўлга қўйган бўлсалар-да, улар пул маблағлари 100 % давлат ғазнасига келиб тушишини таъминлай олмайдилар.
