ТОШКЕНТ, 21 фев — Sputnik. Ўзбекистонда туризм соҳасига бағишланган "Туризм" газетасининг илк сони нашрдан чиқди, деб хабар бермоқда Туризмни ривожлантириш давлат қўмитаси.
Ҳозирча ойда икки марта чоп этиладиган газета ўзбек тилида бўлиб, ундан Ўзбекистоннинг туризм салоҳияти, янги ривожланиб бораётган туризм турлари, олим ва мутахассислар мулоҳазалари ўрин олган.
Шунингдек, Ўзбекистонда бўлган чет эллик сайёҳлар таассуротлари, мамлакат табиий ва маданий бойликлари, тарихий меъморий обидалар ва жаҳон туризми билан боғлиқ статистик маълумотлар ҳам бериб борилади.
Таҳририят ушбу соҳага қизиқувчи, газета саҳифаларида ўз мақолалари чоп этилишини истаганларни ҳамкорликка чорлайди.
