Мирзиёев "Бобур" боғини "Дўстлик" боғига айлантиришни таклиф қилди

ТОШКЕНТ, 25 янв — Sputnik. Ўзбекистон президенти Шавкат Мирзиёев ушбу таклифни куни кеча Республика Байналмилал маданият марказининг 25 йиллиги муносабати ўтказилган учрашувда киритди, деб хабар қилмоқда Sputnik Ўзбекистон мухбири.

"…яқинда менга мослаштирилган биноларда жойлашган қатор марказларнинг бир гуруҳ фаоллари ўзларининг меҳнат шароитларини яхшилашга кўмаклашиш тўғрисида мурожаат қилди. Шу муносабат билан пойтахтимиз кўркига кўрк қўшиб турган, илгари «Ўзбекенгилсаноат» акциядорлик жамиятига тегишли бўлган Бобур кўчасидаги бинони Республика байналмилал маданият марказига беришни ва уни Дўстлик саройи деб номлашни таклиф этаман", — деб айтган президент.

У шунингдек, мазкур бинони реконструкция қилиш ва унинг атрофини ободонлаштиришни кўзда тутадиган тегишли ҳукумат қарори қабул қилинишини қўшимча қилган.

Ўзбекистон Бош вазири А.Н.Арипов тегишли идоралар билан биргаликда, бир ой муддатда мазкур боғ ҳудудида Ўзбекистонда истиқомат қилаётган барча элу элат вакилларининг ўзига хос маданияти, урф-одатлари ва пазандачилик анъаналарини намойиш этиши учун павилёнлар барпо қилиш лойиҳасини ишлаб чиқиши буюрилган.

Ўзбекистон Президенти томонидан билдирилган ушбу таклиф йиғилганлар томонидан гулдурос қарсаклар билан қарши олинган.

Мирзиёевнинг сўзларига кўра, Тошкент шаҳрининг Мирзо Улуғбек туманида, эски ҳайвонот боғининг ўрнида қурилаётган янги истироҳат боғига Заҳириддин Муҳаммад Бобур номи берилади.