ТОШКЕНТ, 14 дек — Sputnik. Филиппин президенти Родриго Дутерте Давао шаҳрига мэрлик қилган пайтида жиноятда гумон қилинганларни шахсан ўзи ўлдирганини айтди, деб хабар бермоқда РИА Новости Франс Пресс агентлигига асосланиб.
Шу йилнинг майида президентликка сайланган Дутерте гиёҳвандликка ва гиёҳванд модда сотувчиларига қарши кенг миқёсда кураш бошлади. Полициянинг сўнгги маълумотларига кўра, мамлакатда кейинги ойларда гиёҳвандлик савдосига алоқадор уч мингга яқин киши ўлдирилган.
"Даваода мен шахсан ўзим бу ишни қилганман. Йигитларга (полицияга) мен одам ўлдирганимда нима учун улар ўлдира олмаслигини кўрсатиш учун", — деди Дутерте.
"Мен Давао бўйлаб мотоциклда юрганман ва кўчаларни кезганман. Мен бирорта жиноятчини ўлдириш учун юрардим", — деди Филиппин президенти ва бу кампанияни тўхтатмоқчи эмаслигини айтди.
Родриго Дутерте 22 йил давомида Давао мэри бўлган.
Жаҳон жамоатчилиги Филиппиндаги наркосавдога қарши кураш усулини бир неча бор қоралади. Инсон ҳуқуқлари бўйича БМТ экспертлари ҳукуматни қотилликлар ва жиноятда гумон қилинганларни ўлдиришдан воз кечишга чақирдилар.
