ТОШКЕНТ, 14 окт — Sputnik. Ўзбекистонга уюштирилган расмий ташрифдан сўнг Қирғизистон ҳукумати бунга жавобан ўзбек делегациясини кутиб олиш масаласини кўриб чиқмоқда, деб хабар қилган Қирғизистон ҳукумати аппарати.
Эслатиб ўтамиз, сентябр ойи бошида Ўзбекистон томон Қирғизистоннинг учта йирик вилоятидан делегация аъзоларини Андижонга таклиф қилган эди. Натижада, 1 октябр куни Қирғизистон Бош вазири ўринбосари Мухамметкалим Абулгазиев бошчилигидаги Қирғизистон Республикаси расмий делегацияси Ўзбекистон Республикасининг Андижон вилоятига дўстона ташриф уюштирди.
Тахминларга кўра, Ўзбекистон делегациясининг жавоб ташрифи октябр ойи охири — ноябр ойи бошларига режалаштирилмоқда. Икки давлат ўртасида меморандум чегарага яқин учта вилоят ўртасида имзолангани сабабли, расмий сафар ҳам Қирғизистоннинг чегарага яқин туманларининг бирига уюштирилиши тахмин қилинмоқда.
