ТОШКЕНТ, 1 окт — Sputnik. Дональд Трамп ғалаба қозонган тақдирда, Германия ва АҚШ муносабатлари тақдиридан қаттиқ ташвишга тушган Германия Федератив Республикаси ҳукумати вакиллари миллиардернинг маслаҳатчилари билан кўз илғамас музокараларни ўтказишга киришган. Бордию, республикачи ғалаба қозонса, бу Берлинга жуда қимматга тушиши мумкин, — деб ёзган немис нашри. РИА Новости хабари асосида.
Германия Ташқи ишлар вазирлиги ва Вашингтондаги Германия ваколатхонаси вакиллари республикачилар штаби билан мулоқотни йўлга қўйишга ҳаракат қилишмоқда, шуни таъкидлаш жоизки, ГФР расмийлари Хиллари Клинтон ёрдамчилари билан очиқчасига учрашсалар, Трампнинг одамлари билан эса, аксинча, одамлар кўз ўнгида унчалик яқинлашмасликка ҳаракат қилишади.
Spiegelда ёзилишича, Германия ТИВ раҳбари Франк-Вальтер Штайнмайер унга хос бўлмаган дипломатик хусусият ила Трампни "нафрат тарғиботчиси" деб атаган.
"Америка Президенти Иккинчи жаҳон уруши давридан буён биринчи маротаба ҳарбий альянсни тарқатиб юбориши мумкинлигидан қаттиқ ҳавотир олаётган немис ҳукумати Трампнинг реал режалари ҳақида олдиндан билишга қизиқяпти", — деб ёзади нашр.
Трамп ҳақиқатан ҳам НАТОни эскириб қолган тузилма деб ҳисоблайди. Миллиардерга кўра, бу ҳарбий альянсга ўз европалик иттифоқдошларидан кўра АҚШ кўпроқ пул тикади.
Трамп маслаҳатчиларидан бири, ўз хўжайини номидан иш юритиш ҳуқуқига эга бўлган Сэм Кловисга кўра, ҳаммаси ҳам одамлар ўйлаганчалик қўрқинчли эмас. "Трамп — ҳамиша мунозараларга тайёр бизнесмен", — дея "тинчлантирди" немис элчихонаси вакилларини у.
Немислар, шунингдек, ўз бизнесидан ҳам қаттиқ ҳавотирда: Трамп президент бўлган тақдирда, АҚШ ЯИМ тушиб кетади, деган тахминлар бор, бундан немис экспортчилари катта зарар кўришлари мумкин.
Бундан ташқари, Қўшма Штатлардаги Германия элчихонаси вакилларини канцлер Ангела Меркел шаънига айтилган изоҳлар ҳам тинчлик бермаяпти. Ахир Трамп уни "эскича фикрлайдиган содда социалист" деб атаган.
