ТОШКЕНТ, 24 сен — Sputnik. "Ўзбекистон Республикасининг фуқаролиги тўғрисида"ги Қонунига киритилган ўзгартириш ва қўшимчаларда республика фуқаролигидан маҳрум бўлиш ҳолларига ойдинлик киритилди.
Қонуннинг 21 моддасига киритилган ўзгаришларга мувоқиқ, Ўзбекистон фуқароси хорижий давлат фуқаролигини олса, бунда, у 1 ой муддат ичида Ўзбекистон ИИВ идоралари ёки хориждаги консуллигига фуқаролигини ўзгартирганини маълум қилиши шарт. Илгариги қонунда бундай мажбурият кўрсатилмаган эди.
Қонунга мувофиқ, шунингдек, Ўзбекистон фуқароси: чет давлатда ҳарбий хизмат, хавфсизлик хизмати, полиция, адлия идоралари ёки давлат ҳокимияти ва бошқарувининг бошқа идораларига ишга кирса; чет элда уч йил ичида узрсиз Ўзбекистон консуллиги ҳисобида турмаса; Ўзбекистон фуқаролигини сохта ҳужжатлар ёки ёлғон маълумотлар асосида олган бўлса; чет давлат фойдасини кўзлаш, тинчлик ва хавфсизликка қарши жиноятлар содир этиш орқали жамият ва давлат манфаатларига жиддий зарар етказса Ўзбекистон республикаси фуқаролигидан маҳрум этилади.
