ТОШКЕНТ, 17 авг — Sputnik. Ўзбекистон СССР даврида мавжуд бўлган давлатлараро шаклдаги муносабатларга қайтмайди, дея таъкидлади сиёсатшунос Алишер Бурхонов.
Сиёсатшунос, шунингдек, 2015 йил бошида Ўзбекистон Президенти Ислом Каримов янги сайланган парламент қаршисида сўзлаган нутқи давомида мамлакат ҳеч қачон собиқ Иттифоқ сингари бирлашмаларга қайтмаслиги ҳақида баёнот қилган, дея эслатиб ўтди.
"Сиёсий партиялар ва жамоатчилик ҳаракатлари ҳукумат сиёсатини қўллаб-қувватлайдилар ва уларнинг дастурлари тўлалигича "совет тузуми" деган тушунчани мамлакат ҳаёт тарзидан узоқлаштиришга қаратилган", — дея таъкидлади у.
Бурхонов, шунингдек, Ўзбекистонда оммавий ахборот воситалари ёхуд сиёсий минбарлар ёрдамида совет даври тузумини "оқлайдиган" ижтимоий-мафкуравий муҳит мавжуд эмаслигини қўшимча қилди.
Ҳаётларининг каттагина қисмини совет тузуми даврида яшаб ўтган одамлар, табиийки, СССРни соғинч билан хотирлайдилар, у ҳақда илиқ фикрларни билдиришлари мумкин, ахир уларнинг ёшлиги ўша тузумда ўтган. Аммо ҳозир 35 ёшдан кичик бўлганлар учун СССР — бу тарих", — дея таъкидлади Бурхонов.
Сиёсатшуноснинг фикрига кўра, эндиликда СССР форматидаги муносабатларга қайтиш ҳақида гап бўлиши мумкин эмас. Сабаби, "совет" деган тушунча унутилиши, ўз аҳамиятини йўқотиши учун етарлича вақт ўтди. Жумладан, СССР тарқалган вақтдан буён Ўзбекистонда совет рамзи билан боғлиқ бўлган шаҳар, туман, кўчаларнинг номлари 100% ўзгартирилган.
