Гюлен Эрдўғонни авторитаризм ва шантажда айблади

ТОШКЕНТ, 26 июл — Sputnik. Туркияда давлат тўнтарувига уринишни ташкиллаштиришда айбланаётган мухолиф ислом тарғиботчиси Фатхулла Гюлен Туркия президенти Тойиб Эрдўғон мамлакатда авторитар тузумни барпо этишга уринмоқда, дея таъкидлади. РИА Новости хабарига кўра Гюлен ўзининг бу фикрини New York Times газетасидаги мақоласида эълон қилган.

16 июлга ўтар кечаси бир гуруҳ исёнчилар Туркияда ҳарбий тўнтаришни амалга оширишга уринган. Аммо мамлакат ҳукумати исённи бостиришга муваффақ бўлди. Сўнгги маълумотларга кўра, Истамбул ва Анқара шаҳарларида юз берган тўқнашувлар натижасида, 246 нафар Туркия фуқароси ҳалок бўлган, 2 мингдан зиёд киши жароҳатланган. Расмий Анқара давлат тўнтаришини мухолиф имом Фатхулла Гюлен ташкиллаштирган деган фикрда.

"Туркияда юз берган давлат тўнтаришига уринишни кескин қоралаганман. Ҳукумат куч ишлатиш орқали эмас, балки эркин ва адолатли сайловлар йўли билан ғалаба қозониши лозим", — деб ёзган Гюлен. "Кескин норозиликларимга қарамай, тобора авторитар ҳокимият тарафдори бўлиб бораётган Туркия президенти Тойиб Эрдўғон мени давлат тўнтаришини бошқаришда айблади", — деб қўшимча қилган Гюлен.

"Туркия президенти "Ислом давлати" террорчилик уюшмасига қарши тузилган коалицияда таъсирини сусайтиришини айтиб, АҚШни шантаж қилмоқда", — дея қайд этган Гюлен.

Шундай сўзларни айтиб, Гюлен яна бир марта АҚШ ҳукуматига мурожаат қилиб ўзини Туркияга топширмасликларини сўраган. Мухолифат имомнинг фикрича, уни Туркияда ерда адолатсиз суд кутмоқда. Гюлен шу билан бирга Эрдўғонни шантажда айблаган. "Далиллар, қолаверса, адолатли судлов имконияти йўқлигига қарамай, у менинг экстрадация қилинишимга эришмоқчи", — деб таъкидлаган имом.