КХДР Жанубий Корея портлари ва аэродромлари бўйлаб зарба беришини маълум қилди

ТОШКЕНТ, 20 июл — Sputnik. КХДР сешанба куни ўтказган баллистик ракеталар синовини Жанубий Корея портлари ва аэродромларига зарба беришга тайёргарлик мақсадида амалга оширганини маълум қилди, дея хабар тарқатмоқда РИА Новости Шимолий Корея радиоси тарқатган хабарга асосланган ҳолда.

"Ушбу синов машғулотлари Жанубий Кореядаги жанговар ҳудудларга зарба бериш мақсадини кўзлаб амалга оширилган эди. Ушбу ҳудудга ядровий уруш воситаларини олиб кираётган америкалик империалистлар билан ҳисоб-китоб қилиш вақти келди", — дейилган хабарда.

Агентлик хабарига кўра, машғулотларга Шимолий Корея етакчиси — Ким Чен Иннинг шахсан ўзи раҳбарлик қилган.

Эслатиб ўтамиз,1950-1953 йилларда Корея ярим оролидаги ҳарбий тўқнашув тинчлик битими билан якун топганидан бери Қўшма Штатлар ва Шимолий Корея муносабатлари “совуқ уруш” ҳолатида.

Пхеньяннинг тинчлик келишувини имзолашга ва АҚШ билан расмий муносабатларни тиклашга қилаётган ҳаракатлари натижасиз қолмоқда: Вашингтон ушбу масалани муҳокама қилишдан кескин бош тортиб келяпти. Америка “Шимолдан келиши мумкин бўлган хавф”нинг олдини олиш мақсадида Жанубий Кореяга 28 минг аскарини жойлаштирган. Шимолий Корея эса Американинг ушбу ҳаракатини фантазия меваси, деб ҳисоблаб, то АҚШ унга таҳдид қилишни бас қилмас экан, “ядро” қуролини кучайтириб боришини эълон қилди.

2016 йил 6 январ куни Шимолий Корея АҚШ томонидан йўқ қилиниши мумкинлиги хавфини олдини олиш мақсадида водород бомбасини синовдан ўтказганини маълум қилган эди. Америкаликлар бунга жавобан Жанубий Кореяга стратегик аҳамиятга эга бўлган қурол-аслаҳаларни кирита бошладилар.