ТОШКЕНТ, 19 июл — Sputnik. Мармарис шаҳридаги меҳмонхонада 10 дақиқа ушланиб қолганимда, давлат тўнтаришини амалга оширмоқчи бўлганлар, мени ўлдиришарди, деб таъкидлади Туркия президенти Ражаб Тойиб Эрдўғон. РИА Новости хабари асосида.
"Мармарис шаҳрида менга қарши операция ўтказилди. Икки нафар тан соқчим ўлдирилди. Агар 10-15 дақиқага ушланиб қолганимда, мени ҳам ўлдиришар эди ёки асир олишарди", — деди Эрдўғон CNN телеканалига берган интервьюсида.
Туркия президенти, шунингдек, Мармарис шаҳрига оилавий ҳордиқ чиқариш учун борганини маълум қилган.
Эслатиб ўтамиз, 15 июлдан 16 июлга ўтар кечаси Туркияда бир гуруҳ ҳарбийлар ҳукуматни эгаллаб олишга ҳаракат қилган. Улар ҳарбий вертолёт ва танклар ёрдамида аэропорт, кўприк, ОАВ бинолари ва президент саройига ҳужумлар уюштирган. Туркия ТИВ маълумотига кўра, ҳарбий исён оқибатида 290 киши қурбон бўлган.
