Washington Post: Америка энг қийин пайтда ўз иттифоқдошларини ташлаб кетди

ТОШКЕНТ, 7 июл — Sputnik. АҚШ Ҳарбий Ҳаво Кучлари жанг энг қизиган вақтда Суриядаги иттифоқдошларини ташлаб кетди, деб хабар қилмоқда РИА Новости, Washington Post нашридан олинган маълумот асосида.

Washington Postда берилган хабарга кўра, 28 июн куни америкалик учувчилар мамлакат шарқида жойлашган Абу-Кемал шаҳрига ҳужум уюштирмоқчи бўлган Сурия муҳолифат кучларининг хавфсизлигини таъминлаш тўғрисида буйруқ оладилар. Операция авжига чиққан вақтда эса, учувчилар бу туманни тарк этиб, қўшни Ироқдаги Ал-Фалуджа шаҳри чеккасига бориш ҳақида буйруқ олади.

Пентагон вакили Крис Гарвернинг сўзларига кўра, қўмондонлик бир кун олдин бутун техникаси билан Ал-Фалуджа шаҳридан сиқиб чиқарилган "Ислом давлати" жангарилари колоннасини йўқ қилишни афзал билган.

Абу-Кемалдаги Сурия Озод армияси жангчилари эса ортга чекинишга мажбур бўлишган.

Нашрда ёзилишича, барбод бўлган операция туфайли АҚШнинг регионда исломчиларга қарши тура оладиган маҳаллий бўлинмаларни ташкил қилиш режаси пучга чиққан. Нашр "Қўшма Штатлар мамлакат бўйлаб бир жойдан иккинчи жойга ўз ҳарбийларини ташлашга мажбур бўлаётган экан, балки у етарлича куч тўплай олмаётгандир", деган саволни ўртага ташлаган.

Эслатиб ўтамиз, 2014 йилдан буён АҚШ бошчилигидаги 66 мамлакатдан иборат ҳарбий коалиция Суриядаги "ИД" террорчилари позицияларини бомбардимон қилиб келмоқда. Операциялар Сурия ҳукумати расмий рухсатисиз амалга оширилмоқда.