Миср ОАВ: Ўзбекистон ва Хитой стратегик шерикликни мустаҳкамламоқда

ТОШКЕНТ, 6 июл — Sputnik. Қоҳира университети ҳузуридаги Осиё тадқиқотлари маркази директори Ала Фарук қаламига мансуб ушбу мақолада Ислом Каримов ва Си Цзинпиннинг тор доирадаги суҳбатида икки мамлакат ўртасидаги ҳамкорликнинг бугунги ҳолати ва уни янада ривожлантириш истиқболлари муҳокама этилгани баробарида томонларни қизиқтирган минтақавий ва халқаро масалалар юзасидан ҳам ўзаро фикр алмашилган, деб хабар қилади "Жаҳон” АА.

Агентлик хабарига кўра, мақолада Хитой Халқ Республикаси Раисининг ушбу давлат ташрифини изчил ривожланиб бораётган Ўзбекистон — Хитой ҳамкорлиги тарихида муҳим босқич, томонларнинг ўзаро муносабатларни янада мустаҳкамлашга қатъий интилиши ифодаси эканлиги алоҳида қайд этилган.

Газета Президент Ислом Каримовнинг “Ўзбекистон Хитой билан стратегик шериклик ва ўзаро манфаатдорликка асосланган ҳамкорликни юксак баҳолайди ва қадрлайди”, деб айтган сўзларини ўз ўқувчиларининг эътиборига ҳавола қилган.

Нашр ХХР Раисининг Ўзбекистонга навбатдаги ташрифидан мамнун эканини, ўзаро ҳамкорлик барча соҳаларда изчил ривожланиб бораётганини алоҳида таъкидлагани, шунингдек, унинг Ўзбекистондаги бой тарих ва маданиятга катта ҳурмат билан қарашини ташриф чогъи маълум қилганини ҳам қаламга олган.

Шу билан бирга, мақола муаллифи бугунги кунда Ўзбекистон ва Хитой муносабатлари стратегик шериклик даражасига кўтарилгани ҳақида тўхталар экан, икки мамлакат ўртасидаги ҳамкорлик сиёсат, иқтисодиёт, савдо, саноат, қурилиш, илм-фан, таълим, маданият каби барча соҳаларни қамраб олганини таъкидлайди. “Бу алоқалар Стратегик шериклик ўрнатиш тўгърисидаги қўшма декларация, Дўстлик ва ҳамкорлик тўгърисидаги шартнома, Икки томонлама стратегик ҳамкорликни янада чуқурлаштириш ва ривожлантириш ҳақидаги қўшма декларация каби қатор ҳужжатлар асосида изчил тараққий этмоқда”, деб ёзади у.

Мақолада икки давлатнинг халқаро ва минтақавий аҳамиятга молик масалалар бўйича позиция ва ёндошувлари ўхшаш ёки яқин эканлиги, бу эса ўзаро ва кўп томонлама алоқаларида муҳим ўрин тутаётганига ҳам алоҳида ургъу берилган.