ТОШКЕНТ, 26 май — Sputnik. Forbes нашри фикрига кўра, "Катта еттилик"ни аллақачон тарқатиб юбориш керак эди — сабаби, у ҳеч қандай фойдали мақсадга хизмат қилмайдиган атавизм аномалиясининг бир кўриниши, холос.
Сўнгги ўн йил ичида дунёда улкан ўзгаришлар юз берди: Ғарб илгари бўлгани каби, коинотда етакчилик қилмай қўйди, шу боис ҳам, G7 ни сақлаб туришдан ҳеч қандай наф қолмади. Камига, "еттилик" ўрнига аллақачон глобал ташкилот бўлмиш — "Катта йигирматалик" келган, деб ёзади Forbes.
Регионал муаммолар институти Бош директори Дмитрий Журавлев Forbes экспертлари ҳақлигини тасдиқламоқда.
"Forbesнинг ҳар битта ёзган гапида жон бор. Ҳақиқатан ҳам, "катта еттилик" ташкил этилаётган вақтларда, Ғарб давлатлари жаҳон иқтисодиётида салмоқли ўрин эгаллар эди. Бугунги кунда уларнинг орқасида Хитой, Ҳиндистон, Бразилия давлатлари бўй кўрсатиб, кундан кунга жадал равишда ривожланиб бормоқда.
G7 форматидаги учрашувлар эндиликда сиёсатни эмас, балки у ҳақдаги хотираларни эслатмоқда. "Еттилик" давлатларининг рўй бераётган ҳодисаларга таъсир ўтказиши сезиларли даражада пасайган ва бу ҳақиқатни инкор этиб бўлмайди. "Еттилик" аъзолари жараён иштирокчилари мақомини йўқотиб, АҚШ кўзгусига айланди. Кўзгулар билан эса ҳеч ким гаплашишни хоҳламайди. Нега? Чунки бу бефойда. Йигирматалик" аъзолари эса "АҚШ қиролининг мулозимлари" эмас. "Еттиликдан" фарқли ўлароқ "йигирматалик" — бу муаммолар ҳал қилинадиган майдондир", — деди Дмитрий Журавлев Sputnik радиоси эфирида.
