ТОШКЕНТ, 23 май — Sputnik. Ўзбекистон Махсус хизмат вакилари одам савдоси билан шуғулланган жиноий гуруҳ фаолиятини фош қилди, деб хабар қилди Sputnik мухбирига ИИБдаги манба.
Ўзбекистон Миллий хавфсизлик хизмати вакиллари томонидан қўлга олинган жиноятчиларнинг бири самарқандлик 39 яшар Озода Жафаровадир. Аёл 2007-йилдан буён Туркияда яшайди. Интим хизмат кўрсатишлари учун қизларни ёллаб, уларни сотиш билан шуғулланган Озодани орқаваротдан "Озода ширкат" деб чақиришган.
"Жафарова сохта паспорт билан Қозоғистон орқали, айланма йўллар билан Ўзбекистонга келиб-кетиб юрган. Сал кейин Туркияга қизларни сотишда Озоданинг опаси, 47 яшар самарқандлик Рохила Жафарова ҳам алоқадорлиги маълум бўлган. Шу боис, Р. Жафарова ҳам қўлга олинган. Аёл синглисининг топшириғи билан 2015-йилда Туркияга "кўп ҳақ тўланадиган иш" баҳонасида олти нафар самарқандлик аёлни юборганини тан олди. Ҳозирда улар Истамбул фоҳишахоналарида", — деб таъкидлади манба.
Ўзбекистон махсус хизмат вакиллари қизлар Туркияга Теҳрон орқали юборилганини аниқлаганлар. Бунинг учун Рохила Жафарова 49 яшар қариндоши самарқандлик Малика Жўраева ёрдамида Тошкентдаги Эрон элчихонасида қизларга виза тўғрилаб, уларга авиачипталар харид қилган.
"Жонли товар"лар Теҳронда Арманистон фуқароси Марина ҳамда Эрон фуқароси Солих томонидан кутиб олинган ва Истамбулга "кузатиб қўйилган".
Ушбу факт юзасидан Ўзбекистон Жиноят кодексининг тегишли моддалари бўйича жиноий иш очилган, тергов ишлари олиб борилмоқда.
