ТОШКЕНТ, 14 мар – Sputnik, Алёна Палажченко. Анқара шаҳридаги автобус бекатларининг бирида содир этилган терактда ҳалок бўлганлар сони 34 кишига етгани хабар қилинмоқда. Ушбу фожиа юзасидан халққа мурожаат қилган Туркия президенти мамлакатда эндиликда террорчиликка қарши кураш чоралари ниҳоятда кучайтирилиши ҳақида баёнот берди, РИА Новости хабари асосида.
"13 март куни Анқарада содир этилган терактни қаттиқ қоралайман. Ҳалок бўлган кишилар яқинларига чуқур ҳамдардлик билдираман, жароҳат олганларга эса тезроқ соғайиб кетишларини тилайман. Минтақадаги нотинч вазият туфайли, Туркия сўнгги йилларда террорчилар нишонига айланди. Террорчилик уюшмалари ва улар хизматидан фойдаланаётганлар бизнинг фуқароларимизни нишонга олмоқда ва бу борада улар виждонсизларча йўл тутмоқда. Бу галги портлаш террорчиларга қарши курашда қатъиятимизни янада оширди. Биз бу курашда албатта ғалаба қозонамиз ва террорчиларни тиз чўктирамиз", — дейилади президент расмий сайтидаги баённомада.
Анқарадаги портлаш Туркия Бош вазирига қарашли офисларнинг бири яқинида, пойтахт марказида, одамлар энг гавжум вақтда содир этилди.
Миналаштирилган автомобилнинг портлатилиши оқибатида, 34 киши ҳалок бўлди, 125 киши тан жароҳати олди. Автомобил одамларга лиқ тўла иккита автобус ўртасида портлатилгани таъкидланмоқда.
