ТОШКЕНТ, 14 янв — Sputnik. Америка етакчисининг Конгрессга мурожаатида навбатдаги “умид ва ўзгаришлар”га доир ваъдаларни кузатиш мумкин эди. Аммо америкаликлар ягона ўзгаришни кутишмоқда: улар давлат тепасида янги раҳбарни кўришни исташаяпти, деб ёзади The Boston Herald шарҳловчиси, РИА Новости хабарига кўра.
"Америкаликларнинг 70% миллат нотўғри йўлдан боряпти, деган фикрда. Улар 2016 йилда йирик иқтисодий инқироз ҳамда навбатдаги террорчилик акти рўй бермаслигидан умидвор. <…> Бизнинг миллат муроса нелигини билмайдиган, ҳар бир қарори Конгресс ва Конституцияга зид бўлган инсон туфайли, ҳеч қачон, худди ҳозирги каби тарқоқ ҳолга келмаган”, — деб ёзади шарҳловчи.
Обаманинг, айниқса, ташқи сиёсат ва миллий хавфсизлик борасидаги хатолари алоҳида эътиборга лойиқ: “Қўшма Штатлар Ер юзидаги энг қудратли давлат”, — деб таъкидлади Америка президенти.
Аммо Ядро бомбасини синовдан ўтказаётган Шимолий Корея (бу Обама президентлиги давридаги учинчи синов), Россиянинг Сурия можаросидаги иштироки, "Ислом давлати" (террорчилик уюшмаси) ва Париждаги терактлар, шунингдек, ушбу ҳафтада Истамбулда рўй берган терактлар Обаманинг таъкидини катта шубҳа остига қўймоқда. Шарҳловчи Америка президентининг баъзи бир гапларини, жумладан, “Ислом давлати” Қўшма Штатларга таҳдид қилолмаслиги ҳақидаги таъкидини ҳақиқатдан анча йироқ, деб баҳолади.
"Обама яшайдиган дунё – аллақандай афсонавий жойга ўхшайди. У эса нима учун одамлар ҳамма нарсадан норози, ҳар нарсага шубҳаланишларидан ажабланади", — деб ёзади материал муаллифи.
