ТОШКЕНТ, 16 апр — Sputnik. Украина президенти Владимир Зеленский Яқин Шарқдаги ҳарбий кескинлик фонида Киевда Patriot ҳаво мудофаа тизимлари учун ракеталар танқислиги кучайганини айтди.
ZDF телеканалига берган интервьюсида у, агар Яқин Шарқдаги уруш узоқ давом этса, Украина учун қурол-яроғ янада камайишини билдириб, ҳозирги танқисликни “бундан ёмони бўлмайди” деб баҳолади.
Зеленский, шунингдек, Эрон атрофидаги можаро сабаб АҚШнинг эътибори Украинадан чалғияётганини ҳам таъкидлади.
Бу фон ортида Киев Германия ваъда қилган Patriot ракеталари тез орада етиб келмаслигини ҳам очиқ айтди. Украина мудофаа вазири Михаил Федоровнинг маълум қилишича, Берлин эълон қилган юзлаб ракеталар бўйича шартномалар тузилган бўлса-да, уларни етказиб бериш жорий йил охиригача эмас, балки 2027–2029 йилларда бошланади. Унинг айтишича, бу қарорлар келаси қишга эмас, узоқроқ даврга ҳисобланган.
Расмий ахборотда Германия томонидан Patriot тизимлари учун юзлаб ракеталар бўйича шартнома тузилгани, Испания эса Patriot тизимлари учун ракеталар етказиб бериши қайд этилган. Бироқ Киев учун асосий муаммо шундаки, бу ёрдамнинг бир қисми зудлик билан эмас, фақат кейинги йилларда етиб келади.