Тасвирий санъат галереясида “Маҳоратдан комиллик сари” ҳунармандлар кўргазмаси очилди

ТОШКЕНТ, 19 мар — Sputnik. Ўзбекистон Тасвирий санъат галереясида “Маҳоратдан комиллик сари” номли анъанавий амалий санъат кўргазмаси очилди. Кўргазма Наврўз байрами муносабати билан ташкил этилган бўлиб, унда мамлакатнинг етук ҳунарманд усталари жамланган.

Кўргазма экспозициясида кулолчилик, тўқимачилик, ёғоч ўймакорлиги, заргарлик, зардўзлик, читгарлик ва каштачилик каби анъанавий амалий санъат турларига оид ноёб асарлар намойиш этилди.

Тақдим этилган асарлар халқ ҳунармандчилигининг асрлар давомида шаклланган мактаблари ва уларнинг узвий давомийлигини ёрқин акс эттирди.

Тадбирда Ўзбекистон анъанавий ҳунармандчилиги ривожига катта ҳисса қўшган машҳур халқ усталари ҳамда Бадиий академия академикларининг ишларига алоҳида эътибор қаратилди.

Жумладан, Акбар Раҳимов, Мирзабаҳром Абдуваҳобов, Алишер Назиров, Исмоил Комилов, Нўмон Облоқулов, Абдулло Нарзуллаев, Сирожиддин Раҳматуллаев, Аҳмад Арабов, Бахшилло Жумаев, Шариф Раупов ва Абдувоҳид Каримов каби усталарнинг асарлари томошабинларда катта қизиқиш уйғотди.

Кўргазманинг асосий ғояси Наврўзнинг янгиланиш ва яратиш руҳини миллий анъаналар узлуксизлиги билан уйғунлаштиришдан иборат. Унда ҳунармандчилик санъати чуқур билим, бой тажриба ва юксак маҳоратга асосланган жонли бадиий маданият сифатида намоён бўлди.