ТОШКЕНТ, 19 мар — Sputnik. Россия энергетика вазири Сергей Цивилёв Евроосиё иқтисодий комиссияси (ЕИК)нинг энергетика ва инфратузилма вазири Арзибек Кожошев билан ишчи учрашув ўтказди. Бу ҳақда ЕИК матбуот хизмати хабар берди.
Музокараларда нефть ва нефть маҳсулотларининг умумий бозорларини шакллантириш бўйича халқаро шартнома тайёрлаш жараёни, 2030 йилгача умумий газ бозорини ривожлантириш режаси, шунингдек, ЕОИИ умумий электр энергияси бозорини шакллантириш масалалари кўриб чиқилди.
Томонлар ЕОИИда умумий электр энергияси бозорини янада шакллантириш ва ривожлантириш бўйича келишувга эришди. Шу билан бирга, умумий энергия ресурслари бозорларига оид асосий стратегик ҳужжатларни тезроқ қабул қилиш зарурлиги таъкидланди.
Алоҳида эътибор газ соҳасига қаратилди. Цивилёв Россиянинг умумий газ бозорини ривожлантириш режаси лойиҳаси бўйича консолидациялашган позицияси комиссияга юборилгани ва у аввал қабул қилинган қарорларга тўлиқ мос келишини маълум қилди.
Томонлар шартнома шаклини тасдиқлашни жадаллаштириш ва электрон ҳужжат айланишини йўлга қўйиш зарурлигини ҳам қўллаб-қувватлашди.