ТОШКЕНТ, 17 фев — Sputnik. Россия Мудофаа вазирлиги Харьков вилоятининг Купянск-Узловой ҳудудида Украина Қуролли кучлари бўлинмалари ҳалокатли вазиятда қолгани ҳақида маълум қилди.
Вазирлик баёнотида асирга олинган ҳарбий хизматчиларнинг гувоҳликлари ва радиомузокаралар маълумотлари эълон қилингани қайд этилган.
Вазирлик маълумотига кўра, Украина Миллий гвардиясининг 1-махсус топшириқлар бригадаси ҳамда 43-механизациялашган бригада бўлинмалари Оскол дарёсининг шарқий қирғоғида, Купянск-Узловой аҳоли пункти жанубида қамал ҳолатида қолган.
Баёнотда таъкидланишича, ҳарбийлар совуқ уриши ва ҳаддан ташқари совқотиш туфайли катта санитария йўқотишларига дуч келмоқда. Шахсий таркибнинг бир қисми совуқ уриши оқибатида сафдан чиқмоқда. Россия Мудофаа вазирлигининг журналистларга маълум қилишича, мазкур ҳудудда украиналик ҳарбийларнинг 30 фоизи айнан совуқ уриши туфайли сафдан чиққан.
Украина аскарлари очиқ осмон остидаги окопларда ва тизза бўйи лойқа суюқлик тўлган иситилмайдиган блиндажларда исинишсиз ва иссиқ овқатсиз тунашга мажбур бўлмоқда. Гулхан ёқишга уринишлар дронлар орқали осон аниқланади ва аниқланган позициялар йўқ қилинмоқда, дейилади хабарда.
Шунингдек, радиомузокаралар маълумотларига таяниб, ярадорларни эвакуация қилиш имкони чеклангани билдирилган. Вазирликка кўра, бундай шароитда ярадорлар музлаб қолиш хавфига дуч келмоқда.
Купянск йўналишида тунги ҳарорат ҳозир минус олти даражагача пасаймоқда. Совуқ ёмғирлар билан алмашиниб тураётган об-ҳаво УҚК аскарлари учун “ҳақиқий совуқ жаҳаннамга айланди”, дея таъкидлади вазирлик.
Ушбу ҳафтанинг ўрталарида ҳароратнинг кечалари 11 даража совуққача пасайиши кутилаётгани сабабли, бу вазият янада оғирлашади, дея қўшимча қилинган хабарда.