ТОШКEНТ, 13 янв — Sputnik. Пиротехника буюмлари уларнинг хавфлилик зонаси, шу жумладан атрофдаги фазонинг зарарланиш даражасидан келиб чиққан ҳолда хавфлиликнинг I–V синфларига бўлинади. Мазкур тартиб янги қабул қилинган "Пиротехника буюмларининг муомаласи тўғрисида"ги Қонунда белгиланган.
Қонунга мувофиқ, пиротехник таркибнинг ёниши (портлаши) натижасида оптик, акустик, электр ва бошқа визуал эффектларни ҳосил қилиш учун мўлжалланган қурилмалар пиротехника буюмлари ҳисобланади.
Ўзбекистонда хавфлиликнинг I синфига кирувчи пиротехника буюмларини жисмоний ва юридик шахслар томонидан ишлаб чиқариш, тайёрлаш, Ўзбекистон ҳудудига олиб кириш, ташиш, ўтказиш, сотиб олиш, сақлаш ва улардан фойдаланишга рухсат берилади.
Ўзбекистонда хавфлиликнинг II–V синфларига кирувчи пиротехника буюмларини ишлаб чиқариш, тайёрлаш, Ўзбекистон ҳудудига олиб кириш, ташиш, жўнатиш, ўтказиш, сотиб олиш, сақлаш ҳамда улардан фойдаланиш тақиқланади.
Пиротехника буюмларининг муомаласи устидан давлат назорати Миллий гвардия, ички ишлар органлари ҳамда божхона органлари томонидан амалга оширилади.