ТОШКЕНТ, 25 дек – Sputnik. Sputnik Ўзбекистон мультимедиа матбуот марказида "Ўзбекистон соғлиқни сақлаш тизимини рақамлаштириш. Янги электрон рецептлар тизими" мавзусида матбуот анжумани бўлиб ўтди.
Тадбирда "Uzinfocom" компаниясининг соғлиқни сақлашни рақамлаштириш бўйича директори Руслан Султанов, Соғлиқни сақлаш вазирлигининг рақамли технологияларни жорий этиш ва мувофиқлаштириш бўлими бошлиғи ўринбосари Наврўзбек Аллаберганов, Соғлиқни сақлаш вазирлиги ҳузуридаги Фармацевтика маҳсулотлари хавфсизлиги маркази мутахассиси Мавлуда Ғиёсова ҳамда Тошкент шаҳар Яшнобод тумани тиббиёт бирлашмаси бошлиғи ўринбосари Галина Дурманова иштирок этди.
Спикерлар Вазирлар Маҳкамасининг "Соғлиқни сақлаш тизимини рақамлаштириш жараёнларини янада жадаллаштиришга доир қўшимча чора-тадбирлар тўғрисида"ги қарорининг асосий қоидалари ҳақида маълумот беришди.
ССВ ҳузуридаги Фармацевтика маҳсулотлари хавфсизлиги маркази мутахассиси Мавлуда Ғиёсованинг таъкидлашича, аҳолини тиббиётга яқинлаштириш, ўз-ўзини даволаш ҳолатларини камайтириш ҳамда рецепт билан бериладиган дори воситаларини қатъий назорат қилиш мақсадида электрон рецепт тизими жорий этилмоқда.
Сўнгги йилларда аҳолининг поликлиникага мурожаат қилмасдан, дорихоналар орқали ўзини-ўзи даволаши, хусусан антибиотикларни шифокор тавсиясисиз қабул қилиши жиддий муаммога айланган. Электрон рецепт тизими айнан шу ҳолатларнинг олдини олишга қаратилган.
ССВнинг рақамли технологияларни жорий этиш ва мувофиқлаштириш бўлими бошлиғи ўринбосари Наврўзбек Аллабергановнинг қайд этишича, илгари рецепт билан бериладиган дорилар тизими қоғоз шаклида мавжуд бўлган, аммо электрон рецептнинг ишлаш механизми аниқ белгилаб қўйилмаган эди. Энди эса мазкур тартиб ҳукумат қарори билан тасдиқланиб, шифокор, бемор ва дорихона ходимларининг ҳуқуқ ва мажбуриятлари аниқ белгилаб берилди.
Мутахассислар фикрича, электрон рецепт тизими дори воситаларидан оқилона фойдаланиш, беморларнинг шифокорга бўлган ишончини ошириш ҳамда даволаш сифати ва хавфсизлигини таъминлашга хизмат қилади.
Кекса, ётоқдаги, поликлиникага кела олмайдиган беморлар учун шифокор уйига бориб, мобил илова орқали электрон рецепт расмийлаштиради. Дорини беморнинг яқинлари ёки вакили дорихонадан олиб келиши мумкин.
Қайси дори рецептли ёки рецептсиз эканини билиш учун махсус онлайн сервислар ҳам ишга туширилган.
Батафсил - Sputnik видеосида.