ТОШКЕНТ, 22 окт – Sputnik. Россия ташқи савдо ва экспорт сиёсатини қайта йўналтириб, Евроосиё иқтисодий иттифоқи (ЕОИИ), МДҲ, БРИКС ва ШҲТ каби мамлакатларнинг истиқболли бозорларига чиқишни кенгайтирмоқда.
Бу ҳақда Россия бош вазири Михаил Мишустин "Сделано в России" халқаро экспорт форумининг ялпи мажлисида сўзлаган нутқида айтиб ўтди.
"Сўнгги тўрт йилда ушбу йўналишларда экспорт ҳажми барқарор ошиб бормоқда. Агар 2021 йилда у умумий ҳажмда атиги 44 фоизни ташкил этган бўлса, 2024 йилда 85 фоиздан ошди. Жорий йилда ҳам бу тенденция давом этмоқда", - деди Мишустин.
Бош вазир, шунингдек, Россиянинг Осиё, Африка ва Лотин Америкаси давлатлари билан савдо-иқтисодий ҳамкорлиги изчил кенгайиб бораётганини таъкидлади.
Аввалроқ глобал чақириқларни енгиб ўтиш учун ЕОИИ ягона транспорт-логистика маконини шакллантираётгани ҳақида хабар берилган эди.
Евроосиё иқтисодий комиссияси энергетика ва инфратузилма вазири Арзибек Кожошевнинг сўзларига кўра, Иттифоқ учта устувор йўналишга эътибор қаратмоқда: товарларнинг тўсиқсиз ҳаракатланишини таъминлаш, транспорт тизимининг самарадорлиги ва ўзаро боғлиқлигини ошириш, транспорт хизматларининг умумий бозорини яратиш.