ТОШКЕНТ, 20 сен – Sputnik. Ўзбекистон ва Кения ўртасида дипломатик муносабатлар ўрнатилди. Бу ҳақда Ўзбекистон ташқи ишлар вазирлиги (ТИВ) хабар берди.
Маълум бўлишича, қўшма баённомани Ўзбекистон ТИ вазири Бахтиёр Саидов ҳамда Кениянинг Бош вазири, ташқи ишлар ва диаспора ишлари вазири Мусалия Мудавади имзолашган.
“Кения Африканинг энг динамик иқтисодиётларидан бири ва технология ҳамда инновациялар маркази сифатида жадал тараққиёт намоён этмоқда”, – дейди Бахтиёр Саидов.
Вазирнинг сўзларига кўра, томонлар икки мамлакат халқларига сезиларли наф келтирадиган самарали ҳамкорлик учун кенг кўламли имкониятларни муҳокама қилишган.
Замонавий Кения – Африканинг шарқий соҳилида жойлашган мамлакат. У Ўзбекистон билан дипломатик муносабатлар ўрнатган 164-давлатга айланди.