ТОШКЕНТ, 28 август — Sputnik. Қозоғистоннинг Актау шаҳрида 28–30 август кунлари “Made in Uzbekistan” номи остидаги ўзбек миллий маҳсулотлари ярмаркаси бўлиб ўтмоқда, деб хабар қилади "Дунё" ахборот агентлиги.
Маълумотларга кўра, ярмаркада Ўзбекистоннинг Қорақалпоғистон Республикаси, Хоразм, Қашқадарё, Фарғона вилоятлари ҳамда Тошкент шаҳридан 50 тадан ортиқ ишлаб чиқарувчи корхона ўз маҳсулотларини тақдим этади.
Кўргазмада кенг турдаги маҳсулотлар — янги ва қуритилган мевалар, сабзавотлар, сут маҳсулотлари, консервалар, ширинликлар, тўқимачилик буюмлари, қурилиш материаллари, мебель, электротехника жиҳозлари, ҳунармандчилик асарлари, гиламлар ва сувенирлар намойиш қилинмоқда.
Қайд этилишича, айни тадбир “Caspian Oil City” марказида ўтказилмоқда. Ташкилотчиларнинг таъкидлашича, мазкур ярмарка Манғистау вилояти аҳолиси учун сифатли ва арзон маҳсулотларни тўғридан-тўғри ишлаб чиқарувчилардан харид қилиш имконини беради.