ТОШКЕНТ, 6 авг – Sputnik. Ўзбекистон бош вазири ўринбосари Жамшид Ходжаев бошчилигидаги делегация Хитойнинг "China National Gold Group" компанияси вакиллари билан учрашув ўтказди. Бу ҳақда Тоғ-кон саноати ва геология вазирлиги матбуот хизмати хабар берди.
Учрашув давомида Тоғ-кон саноати ва геология вазири ўринбосари Улуғбек Юсупов CNGG компанияси раҳбарияти билан ўзаро англашув меморандумини имзолади.
Ҳужжатга кўра, вазирлик ва CNGG қимматбаҳо ва критик минераллар йўналишида истиқболли майдонларда геология қидирув ишларини амалга ошириш, конларни ўзлаштириш, қўшилган қийматли маҳсулотлар ишлаб чиқариш, технологиялар трансфери, кадрлар тайёрлаш, истиқболли лойиҳаларни молиялаштириш йўналишларида ҳамкорлик қилади.
Маълумот учун: "China National Gold Group Corporation" (CNGG ёки China Gold) - Хитойнинг асосий давлат олтин қазиб олиш корпорацияси бўлиб, олтин, кумуш, мис ва молибден қазиб олиш ҳамда қайта ишлаш билан шуғулланади. Компания 1979 йилдан бери фаолият юритиб келаётган "China Gold General Corporation" негизида 2003 йилда қайта ташкил этилган. Корпорация Хитой Давлат мулкини назорат қилиш ва бошқариш қўмитасига бўйсунади.