ТОШКЕНТ, 5 авг – Sputnik. Украина томони Россиянинг жанговар тўқнашув чизиғида қисқа муддатли гуманитар танаффуслар жорий этиш таклифига ҳалигача аниқ жавоб бермади. Бу ҳақда "Россия 24" телеканали эфирида Киев режими жиноятлари бўйича Россия Ташқи ишлар вазирлигининг ўта махсус топшириқлар бўйича элчиси Родион Мирошник маълум қилди.
"Ҳозирча Киев томонидан "ҳа, биз тайёрмиз, келинг, бу ташаббусни амалга оширишга ўтайлик" мазмунидаги аниқ муносабат билдирилмади," - деди у.
Мирошникнинг таъкидлашича, Украина, аксинча, ёлғон баҳоналар орқали танаффусларга эга бўлиб, ҳарбий салоҳиятини кучайтириш ва можарони давом эттириш учун улардан фойдаланишга ҳаракат қилмоқда.
Эслатиб ўтамиз, 23 июль куни Россия Украинага фронт чизиғида 24-48 соат давом этадиган қисқа муддатли гуманитар танаффуслар эълон қилиш имкониятини кўриб чиқишни таклиф қилди. Россия президенти ёрдамчиси Владимир Мединскийнинг сўзларига кўра, ташаббус ҳалок бўлганларнинг жасадларини ва ярадорларни эвакуация қилиш учун санитар гуруҳлари хавфсизлигини таъминлашга қаратилган эди.
Ушбу ташаббус гуманитар нуқтаи назардан муҳим бўлишига қарамай, Киев ҳалигача расмий муносабат билдирмаган.