ТОШКЕНТ, 4 авг – Sputnik. 2025-2028 йилларга мўлжалланган Евроосиё иқтисодий иттифоқи (ЕОИИ) ва Эрон ўртасидаги эркин савдо ҳудуди (ЭСҲ) тўғрисидаги битимни амалга ошириш бўйича йўл харитаси сентябрда тасдиқланиши режалаштирилган. Бу ҳақда Евроосиё иқтисодий комиссияси (ЕИК) ҳайъати раиси Бакитжан Сагинтаев Эроннинг Россиядаги элчиси Козим Жалолий билан учрашувда маълум қилди.
Томонлар Евроосиё иқтисодий интеграциясининг долзарб, жумладан, иттифоқнинг халқаро фаолиятининг устувор йўналишларига оид масалаларни муҳокама қилишди. Хусусан, ЕОИИ мамлакатларининг Эрон билан 90 фоиз товарларга нисбатан божсиз режимни назарда тутувчи эркин савдо ҳудуди тўғрисидаги тўлақонли битим доирасидаги ҳамкорликнинг истиқболли йўналишлари юзасидан фикр алмашилди.
ЕИК ҳайъати раиси комиссия 2025 йилдан 2028 йилгача бўлган даврда эркин савдо ҳудуди тўғрисидаги битимни амалга ошириш бўйича йўл харитасини батафсил ишлаб чиқишга катта аҳамият бераётганини маълум қилди.
Таъкидланишича, ҳужжат 2025 йил сентябрида Қўшма қўмита йиғилишида тасдиқланиши режалаштирилган. Бу ўзаро ҳамкорликнинг барча режалаштирилган йўналишларини мувофиқлаштирилган тарзда илгари суриш имконини беради.
Сагинтаев янги формат туфайли ЕОИИ давлатлари ва Эроннинг савдо-иқтисодий муносабатлари ривожланишнинг янги даражасига кўтарилганини қайд этди.
“Биз 2024 йилда 14,6 фоизга ўсиб, 5,9 млрд долларни ташкил этган мамлакатларимиз товар айланмасида сезиларли ўсишни кўрмоқдамиз. ЕОИИ давлатларидан Эронга экспорт 18 фоизга ўсди”, - деди ЕИК ҳайъати раиси.
Суҳбатдошлар ЕОИИ ва Эрон мамлакатлари транспорт ва логистика инфратузилмасини ривожлантириш, корхоналар ўртасидаги кооперация алоқаларини кенгайтириш, агросаноат мажмуи, нефтни қайта ишлаш ва нефть-кимё тармоқларида ҳамкорликни янада ривожлантириш учун катта салоҳиятга эга деган фикрга келишди.
ЕОИИ
Евроосиё иқтисодий иттифоқи (ЕОИИ) - 2015 йил 1 январдан фаолият юритиб келаётган халқаро иқтисодий бирлашма. Иттифоққа ҳозир Россия, Арманистон, Беларусь, Қозоғистон ва Қирғизистон аъзодир. Ўзбекистон 2020 йилда ЕОИИда кузатувчи мақомини олди. Молдова, Куба, Эрон ҳам кузатувчи мақомига эга.