ТОШКЕНТ, 29 июл – Sputnik. Сингапурда сув спорт турлари бўйича жаҳон чемпионати доирасида Жаҳон сузиш федерациясининг (World Aquatics) навбатдаги Конгресси бўлиб ўтди. Бу ҳақда Ўзбекистон Спорт вазирлиги матбуот хизмати хабар берди.
Конгрессда спорт вазири Адҳам Икрамов, МОҚ раисининг биринчи ўринбосари Отабек Умаров, МОҚ бош котиби Ойбек Қосимов ва Миллий паралимпия қўмитаси раисининг биринчи ўринбосари, Ижтимоий ҳимоя агентлиги директори биринчи ўринбосари Шаҳноза Мирзиёева иштирок этди.
Конгресс якунларига кўра Шаҳноза Мирзиёева World Aquatics Ижроия қўмитаси Бюроси аъзоси этиб сайланди.
Таъкидланишича, ушбу қарор халқаро тузилмаларда ўзбек мутахассисларининг мавқеини мустаҳкамлайди ва Ўзбекистонда сув спорт турларини ривожлантиришга, шу жумладан, ҳавзалар қуриш ва ёшлар дастурларини қўллаб-қувватлашга хизмат қилади.