ТОШКЕНТ, 28 июл – Sputnik. Ўзбекистонда янги турдаги юк кўтарувчи темир йўл вагонларини ишлаб чиқариш бошланмоқда. Бу ҳақда "Ўзбекистон темир йўллари" матбуот хизмати хабар берди.
Маълум қилинишича, Андижон механика заводи Олмалиқ кон металлургия комбинати билан ҳамкорликда 6 ўқли, 115 тонна юк кўтарувчи думпкар-самосвал вагонларини ишлаб чиқариш маҳаллийлаштирилди.
Ушбу йўналишдаги илк вагонни Ўзбекистон мустақиллигининг 34 йиллиги муносабати билан 2025 йил август ойида жўнатиш режалаштирилган.
Лойиҳа 2024 йил 21 ноябрь куни “Ўзбекистон темир йўллари”, Андижон механика заводи ҳамда Олмалиқ кон металлургия комбинати ўртасида имзоланган меморандум доирасида амалга оширилмоқда. Унинг умумий қиймати – 501,76 млрд сўм.
Шунингдек, "Навоийуран" ДК буюртмасига асосан 2025 йил давомида 45 дона 15−9724 ва 15−9724−04 русумли вагон-цистерналар ишлаб чиқарилиб, қиймати 59 млрд сўм миқдоридаги маҳсулот етказиб берилди. Уларнинг 10 донаси фойдаланишга топширилган.
Маҳаллийлаштирилган маҳсулотлар экспорт ҳам қилинмоқда. Хусусан, Туркманистоннинг “Ege Logistika” компанияси билан тузилган шартнома асосида умумий қиймати 4,452 млн доллар бўлган 56 дона 15−9721 русумли нефть маҳсулотлари ташувчи вагон цистерналар етказиб берилмоқда. Ҳозир бу компанияга 6 дона вагон (477 минг доллар) жўнатилган. Шунингдек, туркманистонлик тадбиркорга ҳам шунча миқдорда экспорт амалга оширилмоқда.
Қозоғистоннинг “Kazsink Temir Trans” компанияси учун эса Ўзбекистон ҳудудида қайта ишланган, олтингугурт кислотасини ташувчи 10 дона вагон-цистерналар экспорт қилинмоқда. Шартнома қиймати 301 минг долларга тенг.