ТОШКЕНТ, 21 июл – Sputnik. Тошкент шаҳри Олмазор туманидаги омборхонада жойлашган сиғимдан водород пероксиди моддаси очиқ ҳавога сизиб чиқиши юзасидан суриштирув ишлари олиб борилмоқда. Бу ҳақда Фавқулодда вазиятлар вазирлиги (ФВВ) матбуот хизмати маълум қилди.
Таъкидланишича, кеча тумандаги Узумбоғ кўчасида ҳаводан олтин гугурт ҳиди келаётганлиги ҳақида хабар келиб тушган. Ижтимоий тармоқларда ҳам шунга ўхшаш хабарлар кенг тарқалган.
Хабарга асосан зудлик билан Тошкент шаҳри ФВБнинг Радиацион, кимёвий ва тиббий-биологик ҳимоя бўлимлари айтилган манзилга етиб борган.
Бирламчи маълумотларга кўра, омборхонада жойлашган сиғимдан водород пероксиди моддаси очиқ ҳавога сизиб чиқиши кузатилган. Бу ҳолат соат 04:00 да тўлиқ бартараф этилди.
Вазирлик ҳозир ҳолат юзасидан суриштирув ишлари олиб борилаётганини қўшимча қилган.