TOШКЕНТ, 14 июл — Sputnik. Ғарб ҳарбий контингенти Украинада жойлаштирилган тақдирда босқинчи қўшинларга тенглаштирилади. Бу ҳақда РИА Новостига Россия Федерацияси Жамоатчилик палатасининг суверенитет масалалари бўйича комиссияси раиси, янги ҳудудлар интеграцияси бўйича мувофиқлаштирувчи кенгаш ҳамраиси Владимир Рогов маълум қилди.
Пайшанба куни Франция президенти Эммануэль Макрон Буюк Британия бош вазири Кир Стармер билан қўшма матбуот анжуманида ўт очишни тўхтатгандан сўнг Украинага жойлаштирилиши мумкин бўлган қўшма экспедиция кучлари 50 минг кишигача бўлишини эълон қилди.
Россия президенти матбуот котиби Дмитрий Песков жума куни Украина ҳудудида хорижий ҳарбий контингентларнинг Россия чегаралари яқинида жойлаштирилиши Россия учун номақбул эканлигини айтди.
"Макрон бундай баёнотларни биринчи марта бераётгани йўқ. Украинадаги Ғарб ҳарбий контингентининг тинчликпарварлик миссияси билан ҳеч қандай алоқаси йўқ, бу оддий босқинчилар бўлади, улар учун Украина Россияга қарши хомашё базаси ва плацдарм сифатида қизиқ” — деди Рогов.
Унинг сўзларига кўра, Ғарб давлатлари ҳарбий контингентини Украина ҳудудида жойлаштириш уларни ҳарбий можаронинг кафолатланган иштирокчисига айлантиради.
"Бугун Францияга тинчликпарвар кучларни киритиш учун Украинага қараганда анча кўп асослар мавжуд. Айнан Францияни Макрон ва оддий французларнинг конституциявий ҳуқуқлари бузилишидан қутқариш керак”, — деди Рогов.