ТОШКЕНТ, 9 июл — Sputnik. Евроосиё иқтисодий иттифоқи (ЕОИИ)да айрим товарлар учун маркировкалашнинг умумий қоидалари белгиланмоқда. Бу ҳақда ЕИК матбуот хизмати хабар берди.
Евроосиё иқтисодий комиссияси (ЕИК) кенгаши Россия Федерациясининг таклифларини кўриб чиқиб, бир қатор янги тоифадаги товарларга нисбатан рақамли маркировкалашнинг умумий қоидаларини белгилаш тўғрисида қарор қабул қилди.
Жумладан:
осётр ва лосось балиқларининг икралари;
велосипедлар ва велосипед рамалари;
сурков мойларининг айрим турлари;
сурков материаллари ва махсус автомобиль суюқликлари;
антимикроб таъсирга эга бўлган косметика маҳсулотлари;
дезинфекцияловчи воситалар.
“Маркировкаланадиган товарлар сонининг кенгайиши истеъмолчиларга маҳсулотнинг ҳақиқийлигига ишонч ҳосил қилиш имконини берадиган, шунингдек ноқонуний айланмани камайтириш ҳисобига бозорнинг ҳалол иштирокчилари рақобатбардошлигини оширадиган Иттифоқнинг умумий маркировкалаш тизими ривожланаётганидан далолат беради”, — тушунтирди ЕИК савдо вазири Андрей Слепнев.
Унинг қўшимча қилишича, янги товарлар гуруҳларини маркировкалаш, аввалгидек, ягона қоидалар бўйича амалга оширилади. Бунда 2019 йилда ЕИК Кенгашининг қарори билан тасдиқланган ЕОИИда товарларни идентификация воситалари билан маркировкалаш тизимининг базавий технологик ташкилий модели қоидалари ҳисобга олинади. Шу тариқа, кодларнинг ўзаро тан олиниши таъминланади, бу эса товарлар Иттифоқда муомалада бўлганда уларни қайта маркировкалаш заруратини истисно этади.