TOШКЕНТ, 1 июл — Sputnik. Санкт-Петербург биржаси БРИКС, ЕОИИ ва Яқин Шарқ мамлакатлари ўртасида биржа савдоси учун инфратузилма яратмоқда. Бу ҳақда биржа раҳбари Игорь Артемев РИА Новостига берган интервьюсида маълум қилди.
Унинг сўзларига кўра, Санкт-Петербург халқаро иқтисодий форумида 7 та товар ва фьючер биржалари ўртасида Товар биржаси ассоциациясини ташкил этиш тўғрисидаги битим имзоланганидан сўнг ушбу биржа кўприкларини амалий шакллантиришга киришилади.
Ҳужжатни Хитой, Ҳиндистон, Эрон, Ўзбекистон, Қозоғистон, Беларусь ва Россия биржалари имзолади. Келишувга яна етти-саккизта биржа қўшилиши кутилмоқда.
“Бизда иккита асосий йўналиш бор. Биринчиси - товар олди-сотдиси, ўзаро экспорт-импорт операциялари. Биз брокерлар алмашинуви дастурини ҳам ишлаб чиқамиз. Шу тариқа биз барқарор технологик алоқа каналларини, ўзаро савдо учун ягона протоколларни таъминлаяпмиз. Биз Ҳиндистон, Хитой ва Эрон билан ҳам шуни режалаштирмоқдамиз. Россиялик брокерлар уларнинг биржаларида, бошқа мамлакатларнинг савдо агентлари эса бизнинг биржаларимизда рўйхатдан ўтишлари ва операцияларни амалга оширишлари мумкин бўлади”, — деди у.
Иккинчи йўналиш - халқаро нархлар агентлигини ташкил этиш. Агар БРИКСга аъзо мамлакатлар биржада савдо қилишни бошласа, экспорт-импорт операцияларини амалга ошириш натижасида муқаррар равишда нарх индекслари пайдо бўлади.
Унинг сўзларига кўра, ҳозир ЕОИИ доирасида ягона эмас, балки умумий энергия ресурслари бозорлари ривожланмоқда.
“Бозорларни тартибга солиш бўйича умумий ёндашувларни белгилаш, қонунчиликни унификация қилиш орқали мамлакатларимиз қонунчилигини уйғунлаштириш тўғрисида қарор қабул қилинди. Ягона бозорларни шакллантириш ривожланишнинг кейинги босқичи бўлиши мумкин. Биз нефть ва нефть маҳсулотларининг умумий бозорларида биржа савдоларини тартибга солувчи ҳужжатларни тайёрлашда иштирок этамиз. Биржа инфратузилмаси нефть ва нефть маҳсулотларининг умумий бозорларида биржа савдоларини ўтказишга тайёр”, — деди у.
Айтилишича, ушбу механизмга Беларусь ва Қозоғистон биржалари қизиқиш билдирмоқда.