TOШКЕНТ, 22 июн — Sputnik. Россия АҚШнинг 22 июнь тонгида Исроилнинг Ислом Республикасига ҳужумлари ортидан Эрондаги бир қатор ядровий объектларга берган зарбаларини кескин қоралайди. Бу ҳақда Россия ташқи ишлар вазирлигининг Эрон ҳудудига АҚШ зарбалари муносабати билан эълон қилинган баёнотида маълум қилинган.
“Суверен давлат ҳудудини ракета-бомба зарбаларига дучор қилиш тўғрисидаги масъулиятсиз қарор, қандай далиллар келтирилишидан қатъи назар, халқаро ҳуқуқни, БМТ Низомини, илгари бундай ҳаракатларни йўл қўйиб бўлмайдиган деб аниқ тавсифлаган БМТ Хавфсизлик Кенгаши резолюцияларини қўпол равишда бузади. Айниқса, зарбаларни БМТ Хавфсизлик кенгашининг доимий аъзоси бўлган давлат амалга оширгани хавотирли”, — дейилган хабарда.
Айтилишича, ушбу акциянинг оқибатлари, шу жумладан радиологик оқибатлари ҳали баҳоланиши керак. Аммо ҳозирданоқ минтақавий ва глобал хавфсизликка янада путур етказиши мумкин бўлган хавфли эскалация бошлангани аниқ.
Шусиз ҳам кўплаб инқирозлар билан қамраб олинган Яқин Шарқда можаронинг кучайиш хавфи сезиларли даражада ошди, дейилган баёнотда. Эрон ядровий объектларига ҳужумлар натижасида Ядро қуролини тарқатмаслик тўғрисидаги шартномага асосланган глобал тарқатмаслик режимига етказилган зарар алоҳида ташвиш уйғотмоқда. Эронга берилган зарбалар шартнома обрўсига ва унга асосланган МАГАТЭ текширув ва мониторинг тизимига катта зарар етказди.
“Агентлик раҳбариятидан айланма гапларсиз ва сиёсий "тенг масофа" ортига яширинишга уринишларсиз тезда профессионал ва аниқ муносабат кутамиз. Агентликнинг яқин вақт ичида бўлиб ўтадиган махсус сессиясида кўриб чиқиш учун МАГАТЭ бош директорининг холис маърузаси зарур. Албатта, БМТ Хавфсизлик Кенгаши ҳам бунга муносабат билдириши шарт. АҚШ ва Исроилнинг қарама-қарши ҳаракатларини биргаликда рад этиш керак”, — дейилган баёнотда.
Россия ТИВ тажовузни тўхтатишга, вазиятни сиёсий-дипломатик йўналишга қайтариш учун шароит яратиш бўйича саъй-ҳаракатларни кучайтиришга чақирган.