"Uzbekistan Airways" ва "Azerbaijan Airlines" ўртасида битим имзоланди - тафсилотлар

ТОШКЕНТ, 17 июн — Sputnik. “Uzbekistan Airways” ва “Azerbaijan Airlines” йўловчилар учун янги имкониятлар тақдим этмоқда, дея хабар берди компания матбуот хизмати.

“Uzbekistan Airways” Тошкентдаги бош офисида Ўзбекистоннинг флагман авиаташувчиси ва Озарбайжоннинг миллий авиаташувчиси – “Azerbaijan Airlines” (AZAL) авиакомпанияси Ўзбекистон ва Озарбайжон ўртасида саёҳат қилиш учун янги уфқларни очадиган парвозларни биргаликда амалга ошириш (code-share) тўғрисидаги битимни имзолади.

Қайд этилишича, янги ҳамкорлик туфайли йўловчиларга Тошкентдан Бокуга ва ортга қайтувчи, шунингдек, Бокудан Тошкентга ва ортга қайтувчи йўналишлар бўйича саёҳатларни режалаштиришда янада кўпроқ мослашувчанлик тақдим этилади.

“Эндиликда саёҳатчилар иккала авиакомпаниянинг ҳафтасига мавжуд тўққизта авиақатновидан энг қулайини танлаш имкониятига эга. Келишув транзит йўловчиларга туташувларнинг кенг танловини ҳам тақдим этиб, Тошкент ва Бокудаги хаблар орқали халқаро саёҳатлар учун йўналишларнинг қулайлиги ва оммабоплигини оширади”, — дея қайд этилган хабарда.

Бундан ташқари, “Uzbekistan Airways” йўловчилари “Azerbaijan Airlines” авиакомпаниясининг Самарқанд – Боку – Самарқанд йўналиши бўйича парвозларидан фойдаланишлари мумкин бўлади.

“Ҳар бир янги келишув билан биз шаҳарларимиз ва маданиятларимизни яқинлаштирмоқдамиз. AZAL билан "code-share" – бу нафақат йўловчилар учун қулайлик, балки Ўзбекистон ва Озарбайжон ўртасидаги дўстлик ва очиқлик рамзи. Ишончимиз комилки, бу ҳамкорлик саёҳатлар учун янги имкониятлар очади ва халқларимизни яқинлаштиради”, — деди “Uzbekistan Airways” Бошқарув раисининг тижорат ва туризм бўйича ўринбосари Шуҳрат Ядгаров.

Шунингдек, “Azerbaijan Airlines” авиакомпанияси тижорат директори Жамил Манизаденинг сўзларига кўра, ушбу келишув Озарбайжон ва Ўзбекистон ўртасидаги яқин ҳамкорлик, туризмни ривожлантириш ва дўстликни мустаҳкамлаш йўлидаги қадамдир.

"Сode-share" келишуви – бу авиакомпаниялар ўртасидаги ҳамкорлик шакли бўлиб, унда улар ўз парвоз кодлари остида ҳамкор авиақатновларига чипталарни сотиш ва йўловчиларга йўналишлар ва туташувларнинг кенгроқ танловини тақдим этиш орқали биргаликда парвозларни амалга оширишади.