TOШКЕНТ, 19 май — Sputnik. Ўзбекистон Олий Мажлиси Қонунчилик палатаси спикери Нуриддин Исмоилов Рим папаси Лев XIVнинг расман лавозимга киришиш маросимида иштирок этди, дея хабар берди қуйи палата матбуот хизмати.
Тадбирда қатнашиш учун бутун дунё бўйлаб жами 250 минг киши Ватикан майдони ва унинг атрофига йиғилди.
“Маросимнинг расмий қисми якунланганидан сўнг Қонунчилик палатаси спикери Н.Исмоилов янги сайланган Рим папасини табриклаб, Ўзбекистон Республикаси президенти Шавкат Мирзиёевнинг илиқ саломларини йўллади”, — дейилади хабарда.
Ўз навбатида, янги Рим папаси Ўзбекистон раҳбарияти ва халқига чуқур миннатдорлик билдирди.
Маросимда 156 та хорижий мамлакат, қироллик уйлари ва диний конфессиялардан делегациялар вакиллари қатнашди.
Эслатиб ўтамиз, Рим-католик черковининг янги раҳбари этиб АҚШдан кардинал Роберт Прево сайланди.