ТОШКЕНТ, 18 май — Sputnik. Кеча Тошкентда кучли чанг бўрони кузатилди. Депутат Бахтиёр Пулатов Атроф-муҳит ва табиатни муҳофаза қилиш технологиялари илмий-тадқиқот институти докторанти Батир Халмуратовга таяниб хабар беришича, чанг бўронининг юзага келишига бир нечта омиллар сабаб бўлган.
Кеча Тошкентда кучли чанг бўрони кузатилди. Депутат Бахтиёр Пулатов Атроф-муҳит ва табиатни муҳофаза қилиш технологиялари илмий-тадқиқот институти докторанти Батир Халмуратовга таяниб хабар беришича, чанг бўронининг юзага келишига бир нечта омиллар сабаб бўлган.
Энг асосий сабаб — салқин шимолий ҳаво оқими ва жанубдан кириб келаётган иссиқ ҳаво массасининг тўқнашуви, босимнинг ноодатий ортиши ва кескин шамол кучайишидир. Бу ҳаво массалари ўртасидаги кескин ҳарорат фарқи кучли шамолни келтириб чиқарган.
Айтилишича, шамол тезлиги айрим ҳудудларда 20 м/с дан ошган. Кучли шамол ўз навбатида қуриган тупроқдан ва очиқ ер майдонларидан чанг заррачаларини кўтариб, ҳаво муҳитига тарқатди. Натижада шаҳарнинг турли нуқталарида кўриш масофаси қисқариб, нафас олиш қийинлашган.
“Об-ҳаво шароитини ўрганаётган экспертлар бу ҳолатни “фронтал тўқнашув” деб атайди. Яъни совуқ ва иссиқ ҳаво массалари бир жойда тўқнашганида атмосфера беқарорлашиб, кучли шамол ва чанг кўтарилиши эҳтимоли кескин ортади. Айнан шу жараён бугун Тошкентда булутли осмон, чақмоқ ва қисқа муддатли ёғингарчилик билан бирга кечди”, — дейилади хабарда.
Қайд этилишича, Тошкентда экологик хизматлар томонидан чанг миқдори ва ҳавонинг сифат кўрсаткичлари мониторинг қилинди. Аҳолига очиқ ҳавода узоқ юрмаслик, ниқоб тақиш, болалар ва кекса инсонларни эҳтиёт қилиш тавсия этилмоқда.