ТОШКЕНТ, 8 май — Sputnik. Владимир Путин Улуғ Ватан урушидаги Ғалабанинг 80 йиллиги муносабати билан қатор давлатлар, жумладан Ўзбекистон раҳбарига табрик йўллади, дея хабар берди Кремль матбуот хизмати.
“Владимир Путин Улуғ Ватан урушидаги Ғалабанинг 80 йиллиги муносабати билан Озарбайжон, Арманистон, Беларусь, Қозоғистон, Қирғизистон, Тожикистон, Туркманистон, Ўзбекистон, Абхазия, Жанубий Осетия, Исроил раҳбарларига, шунингдек, Грузия ва Молдова халқларига табрик йўллади”, — дейилади хабарда.
Россия президенти мамлакатлар фашист босқинчиларига қарши елкама-елка жасорат билан курашган, орқа томонда фидокорона меҳнат қилган ота-боболарнинг шонли жасоратлари хотирасини муқаддас ҳурмат билан эъзозлашини алоҳида таъкидлади.
“Ғолиблар авлодининг аҳдларини авайлаб сақлаш бизнинг муқаддас бурчимиздир. Шундай экан, умумий тарихимизни бузиб кўрсатиш, фашистлар ва уларнинг шериклари томонидан содир этилган ваҳшийликларни оқлаш ёки унутишга бўлган ҳар қандай уринишларни муросасиз бостириш жуда муҳим”, — деди Россия давлат раҳбари.
Россия президенти хорижий давлатлар раҳбарлари ва фуқароларига йўллаган табригида Улуғ Ватан уруши фахрийлари ва фронт орти меҳнаткашларига самимий табриклар ва самимий миннатдорлик сўзларини етказди, уларга мустаҳкам соғлик, фаровонлик ва узоқ умр тилади.
“Владимир Путин Грузия ва Молдова халқларига мурожаатларида бизга мерос бўлиб қолган дўстлик ва ўзаро ёрдамнинг эзгу анъаналарини асраб-авайлашга, умумий тарихий меросимиз унутилишига, дўст халқлар ўртасида низо келиб чиқишига йўл қўймасликка чақирди”, — дея қайд этилган хабарда.