ТОШКЕНТ, 7 май — Sputnik. “Тиббиётда 90 кунлик ўзгаришлар” дастури бошланиши эълон қилинди, дея хабар берди президент матбуот котиби Шерзод Асадов ўзининг Telegram-каналида.
Президент Шавкат Мирзиёев раислигида тиббиёт соҳасидаги устувор вазифалар муҳокамасига бағишланган видеоселектор йиғилиши бўлиб ўтмоқда.
Унда қуйидагилар маълум қилинди:
эндиликда тиббиёт бригадаси ҳамда унга бириктирилган аҳоли ўртасида ҳуқуқ ва мажбуриятларни белгиловчи икки томонлама шартнома тузилади;
аҳоли оилавий шифокорни эркин танлайди, бу жараёнларга хусусий оилавий шифокорлар ҳам жалб этилади;
тиббий ёрдамнинг кафолатланган пакети тасдиқланади ва пакет доирасида тиббий хизмат ва дори воситалари тўлиқ бюджетдан қопланади.
Шунингдек, поликлиникада акушер-гинекологлар 2 баробар кўпаяди. Ҳар 3 минг бола учун 1 тадан педиатр штати янгидан қўшилади. Бундан буён бирламчи бўғинда ярим ёки 0,25 ставка бўлмайди. Барча шифокор ва ҳамширалар фақат тўлиқ ставкада ишлайди.
“Оилавий шифокорлар 1,5 минг доллар, ҳамширалар эса 600-800 доллар эквивалентида ойлик оладиган тизим қиламиз. Бу орқали биз шунчаки ойликни эмас – инсон қадрини оширган бўламиз. Лекин, натижа ҳам шунга яраша бўлиши керак”, — деди Шавкат Мирзиёев.
Умуман, тумандаги маҳалла ва оилавий шифокор пунктлари, оилавий поликлиникалар фаолияти мақбуллаштирилиб, 12 мингдан кўп одамга хизмат қиладиган 7 та йирик поликлиника, қолган 27 таси кичик поликлиника сифатида қайтадан ташкил қилинади.
Тумандаги марказий поликлиника эса туман шифохонасининг маслаҳат-диагностика бўлимига айлантирилади. Барча тор соҳа мутахассислари шу ерда ишлайди.
Қайд этилишича, “Тиббиётда 90 кунлик ўзгаришлар” дастури бошланиши эълон қилинди.
Вилоят ҳокимлари қуйидагилар учун масъул бўлади:
кутиш жойларида қулай ўриндиқларни кўпайтириб, навбатни тартибга келтириш;
“она-бола” хоналарини ташкил қилиш;
ногиронлиги борлар эркин ҳаракатланиши учун кириш-чиқиш жойлари, хона ва йўлакларда инклюзив муҳит яратиш;
қўл ювишга иссиқ суви бор покиза ҳожатхоналар ташкил этиш.
“Оддий қилиб айтганда, тиббиёт муассасасига маданият, тартиб-интизом, файз олиб кириб, одамларга ижобий кайфият улашади”, — деди Мирзиёев.
Бунга ҳар бир вилоят ҳокими 10 миллиард сўмдан ажратади. Мутасаддиларга бу ишларни бутун республикада тизимли ташкил қилиш, 90 кун натижаси бўйича президентга батафсил ҳисобот бериш топширилди.